GENERAL SANTOS CITY – Gihingusgan ni Kapitan Rock Garay sa Brgy. Dadiangas South ning syudad nga adlaw-adlawon og dili lang ‘ningas cogon’ ang pagpahigayon og clearing operation sa mga kadalanan nga sakop sa ilang barangay.
Matud pa niini, kauban nila ang clearing team sa syudad sa pagsiguro nga wala nay maglaray daplin sa mga kalsada atubang sa Purok Islam, Casquejo St, De Dios Street og dalang Cagampang human ang gipahigayong clearing operation.
Gibutyag ni Capt. Garay, nga nakaabot kaniya ang report nga pipila gihapon ang magkawat-kawat sa pagtinda sa ilang mga produkto daplin sa mga dalan sama niadtong Dominggo kung diin nagpahulay una ang mga clearing teams sa ilang barangay og kini gipahimuslan sa pipila.
Sa pahayag niini, kaniadto pang Disyembre gimando sa DILG sa tanang mayor nga ang tanang barangay sa ilang gisakopan ang magmugna og Barangay and traffic clearing team kun asa naka-comply ang Dadiangas South.
Giklaro niini nga wala nay nahibilin karon nga naglaray sa Queen Tuna Park kung asa gi-kuyogan sa barangay paingon sa Alunan Bagsakan sa Bula aron sila makaangkon ug ilang pwesto aron makapaninda.
