GENERAL SANTOS CITY – Wala na nakanaog sa iyang tricycle ang usa ka driver human gipusil-patay kagabii sa Brgy Sinawal ning dakbayan.
Nahitabo ang insidente pasado alas-6:00 sa gabii, kung asa giila ang biktima nga si Jay Mangilin, 53-anyos, taga-Phase 1 Prk Maunlad, Apopong.
Matud sa bayaw niini, magkauban sila sa biktima paingon unta sa palengke sa nasampit nga barangay, agi sa diversion road.
Apan gipauna matud pa sila ug mibalik si Mangilin aron mupalit unta ug isda. Apan kalit matud pa silang nakadungog ug buto. Wala na matud pa nila naabtan ang responsable.
Gituuhang gigukod pa ang biktima samtang ginapusil gumikan sa posisyon sa pito ka mga basyo sa bala nga narekober sa crime scene.
Nakaangkon ang biktima ug multiple gunshot wounds sa ulo nga bahin nga maoy hinungdan sa iyang hinanaling kamatayon.
Nasayran nga ang biktima volunteer nga miyembro sa barangay peacekeeping action team sa Apopong, kung asa nailhan matud pa kini nga buutan nga tawo, apil ang iyang asawa.
Padayon karong giimbestigahan sa kapulisan ang nasampit nga insidente, aron masayran ang ilhanan sa responsable, ug sa motibo sa krimen.
