GENSAN – Giklaro ni Gensan City Administrator Shandee-Llido Pestaño nga nasabtan sa lokal nga panggamhanan ang mga kabalaka sa mga vendors kalabot sa mamahimong abang sa puwesto sa Palengke Heneral kon kini mahimong fully operational na.
Sumala niini, gisiguro nila nga “very fair ug very disente” ang kantidad sa rental nga pagasinglon gikan sa mga vendors.
Matud pa niya, base sa kontrata, P50 ang abang matag square meter.
Giklaro usab niya nga sa kasamtangang kahimtang sa Central Public Market, kadaghanan sa mga fish vendors ug meat vendors nag-okupar og 2.5 square meters nga espasyo, samtang adunay ubang fish vendors nga naggamit og 2.3 square meters.
Kon 2.5 square meters ang sukod sa puwesto, mosangpot kini sa P125 matag adlaw nga abang.
Sa usa ka bulan, kini mokabat og P3,750. Lakip na sa maong kantidad ang tanang buhis sumala sa kasabotan sa lokal nga panggamhanan ug sa Robinsons Land Corporation.
Dugang pa ni Pestaño, dili gyud lugi ang mga vendors nga mopili nga mubalik ug magnegosyo sa bag-ong Palengke Heneral.
