Nagsang-at og reklamong obstruction of justice ang Philippine National Police-Criminal Investigation and Detection Group batok kang Senador Robin Padilla ug uban pang indibidwal may kalabotan sa giingong pagtabang sa pag-ikyas ni Senador Ronald “Bato” dela Rosa.
Gikompirma ni Prosecutor General Richard Fadullon nga nasumite ang reklamo sa Department of Justice sa wala pa mag alas-5 sa hapon kagahapon, Huwebes.
Una nang gipahibalo sa CIDG ang plano sa pagsaka og kaso batok kang Padilla ug uban pang personalidad tungod sa giingong pagtabang kang dela Rosa aron makalikay sa mga awtoridad.
Apan hugot nga gilimod ni Padilla ang alegasyon ug giingon nga wala niya tabangi sa pag-ikyas si dela Rosa kundili gipasakay lamang niya kini sa iyang sakyanan paggawas sa Senado niadtong kaadlawon sa Mayo 14.
Samtang, giingon sa CIDG nga adunay koneksyon ang nahitabong pagpamusil sa Senado ug ang giingong pag-ikyas ni dela Rosa.
Si dela Rosa nag-atubang og warrant of arrest may kalabotan sa alegasyon nga indirect co-perpetrator sa kasong crimes against humanity nga konektado sa serye sa mga pagpatay gikan Hulyo 2016 hangtod Abril 2018.
