Mihangyo na ang Criminal Investigation and Detection Group (CIDG) sa International Criminal Police Organization (Interpol) nga mag-isyu og red notice batok sa kanhi presidential spokesman nga si Atty. Harry Roque.
Gikumpirma kini ni CIDG Director Major Gen. Nicholas Torre III.
Una na nga nagpadala og tracker teams ang CIDG aron dakpon ang kapin 50 nga uban pang mga kauban ni Roque nga giakusahan usab, lakip na si Cassandra Li Ong nga giimbestigahan tungod sa ilang giingong kalambigitan sa iligal nga operasyon sa Philippine Offshore Gaming Operator (POGO).
Kahinumduman usab nga giisyuhan si Roque og arrest warrant sa Angeles City Regional Trial Court Branch 118 niadtong Mayo 15 tungod sa giingong paglapas sa Republic Act 9208 o Anti-Trafficking in Persons Act of 2003.
Ang kaso batok kang Roque, Ong ug sa 49 pa ka uban naggikan sa reklamo nga gipasaka sa Department of Justice niadtong Abril tungod sa ilang giingong kalambigitan sa operasyon sa scam hub nga Lucky South 99 sa Porac, Pampanga.
