Gimando sa Cybercrime Investigation and Coordinating Center (CICC) ang temporaryong pag-block sa access sa online game nga GoreBox human sa pagpamusil sa San Jose National High School sa Tacloban City niadtong Lunes sa buntag, Hunyo 22.
Matod sa mga awtoridad, usa sa mga menor de edad nga suspek sa insidente giingong naadik sa maong online game, sumala sa inisyal nga report sa Police Regional Office 8 (PRO-8).
Isip tubag niini, gipahayag sa CICC nga una nilang ipaubos sa temporaryong pag-block ang maong gaming application samtang nagpadayon ang imbestigasyon.
“We are blocking Gorebox temporarily as a precautionary measure pending the investigation. Within the day, expect the app to be blocked,” matod ni Aboy Paraiso.
Dugang pa niya, dili mahimong pasagdan ang posibleng impluwensya sa online content sa nahitabong insidente.
“We cannot ignore possible online influences that may have contributed to this tragic incident,” dugang niya.
Sumala sa CICC, kabahin kini sa mas lapad nga pagsusi aron matino kon adunay direktang kalambigitan ang maong dula sa kremin nga nahitabo.
Samtang, gikatakda usab ang imbestigasyon sa Senate Committee on Women, Children, Family Relations, and Gender Equality sa Hulyo 1 kalabot sa maong insidente, nga nagtumong sa paghisgot sa papel sa mga online platform sa posibleng pagka-expose sa kabatan-onan ngadto sa bayolente nga mga impluwensya.
