Nipasidaan ang Commission on Human Rights (CHR) sa publiko batok sa pag-upload og mga hulagway sa mga bata sa social media, tungod sa padayong pagsaka sa mga kaso sa Online Sexual Abuse and Exploitation of Children (OSAEC) sa nasod.
Matod ni CHR Focal Commissioner for Child Rights Atty. Beda Epres, ang teknolohiya ug artificial intelligence makahimo na sa pagmaniobra sa mga hulagway nga gi-upload sa internet. Mao nga iyang giawhag ang mga ginikanan nga likayan ang pag-expose sa mga hulagway sa ilang mga anak online.
Ang pasidaan nagsunod sa kaso sa usa ka content creator, si Queen Hera, nga nadiskubre nga namaligya og mga video gamit ang imahe sa iyang anak online.
Base sa datos sa UNICEF, ang mga kaso sa OSAEC mi-triple gikan sa 1.3 milyones niadtong 2020 ngadto sa kapin sa 2.7 milyones niadtong 2023. Kadaghanan sa mga suspek mga paryente o ginikanan sa mga biktima.
Matod ni Epres, usa sa mga babag sa ilang imbestigasyon mao ang kahadlok o proteksyon sa mga ginikanan sa mga pamilyang nalambigit. Iyang gihatagan og gibug-aton ang papel sa komunidad sa pagtaho sa mga kadudahang kalihokan ngadto sa CHR o PNP.
Sa laing bahin, ang ‘poverty’ maoy nag-unang rason nganong naapil ang pipila ka pamilya sa OSAEC, sumala sa findings sa CHR.
Siya usab miingon nga ang pipila ka mga tawo adunay sayop nga pagtuo nga basta ang bata dili hilabtan, dili kini pag-abuso — butang nga gilalisan sa CHR, ug gipasiugda ang grabe nga epekto sa psychological trauma sa bata.
Giawhag usab ni Epres ang pagsusi pag-usab sa Anti-OSAEC ug Anti-CSAEM Law (RA 11930), ilabina ang probisyon sa reintegration sa mga biktima.
Daghang mga biktima ang dili gusto nga mapriso ang ilang mga ginikanan, apan walay igong alternatibong paagi sa pag-atiman kanila human sa insidente
