Gapanawagan ang Commission on Human Rights (CHR) og dinaliang aksyon human nga may bag-ong testigo nga posibleng makatabang sa pagresolba sa kaso sa 34 ka nawawalang sabungeros nga giingong gipatay ug gilubong sa Taal Lake.
Gipadala dayon sa lugar ang mga imbestigador gikan sa CHR Region IV-A aron magsugod sa ilang monitoring
Kahinumduman nga nagsugod na og motu proprio investigation ang CHR kaniadtong 2022, apan napakyas kini tungod kay walay testigo nga mitungha ug walay ebidensyang nagtumbok sa eksaktong dapit diin nahimutang ang mga biktima.
Matud ni CHR Commissioner Beda Epres, positibo ang paggawas sa usa ka suspek nga andam nga mahimong state witness ug ipadayag ang kahibalo kabahin sa maong krimen.
Gapanawagan ang CHR sa tanang ahensya sa gobyerno nga magtinabangay aron matul-id na ang dugay nang gipasangil nga kaso ug mahatagan og hustisya ang mga biktima ug ilang mga pamilya.
