GENERAL SANTOS CITY – Gisusi na karon sa National Bureau of Investigation- Sarangani District Office (NBI-SARDO) kung kang kinsa nakarehistro ang chopper nga gisakyan ni KAPA founder Joel Apolinario kaniadtong miadto kini sa prayer rally dinhi sa siyudad.
Kahinumduman nga mitugpa sa Acharon Sports Complex sa Calumpang ning syudad ang usa ka chopper sakay si Apolinario ug nagpakita sa mga miyembro sa KAPA, Hunyo 13, Huwebes.
Pagkahuman ang pipila ka minuto nga pakig-istorya sa mga tao ug pag-atubang dihang gi-interview sa taga media, gilayong mihawa sa lugar si Apolinario sakay sa chopper ug wala na nasayran kung asa mipadulong.
Matud kang Atty. Regner Pineza sa NBI-SARDO, apil nga giimbestigahan kung may clearance ang chopper sa Civil Aviation Authority of the Philippines (CAAP) GenSan aron makalupad kaniadtong tungura.
Kini gumikan gipatuman ang ‘no fly zone’ kaniadtong higayuna sa dinhi sa siyudad tungod sa pagbisita sa dakbayan ni Pangulong Rodrigo Duterte alang sa pagpanghatag ug mga titulo sa mga agrarian reform beneficiaries.
