GENSAN- Nagpasidaan si Dr. Karl Igrobay, Assistant Department Head sa City Health Office sa publiko nga magmabinantayon batok sa “sore eyes” karong panahon sa ting-init, sanglit kini usa ka mananakod nga viral infection nga daling mokatap pinaagi sa direktang kontak o paghikap sa mga butang nga adunay kagaw gikan sa natakdan nga tawo.
Matud pa sa doktor, mahimong mabalik-balikan sa maong sakit ang usa ka indibidwal, busa importante kaayo ang kanunay nga pagpanghunaw sa kamot, paghilam-os, ug paglikay sa paghikap sa mata aron dili matakdan.
Bisan tuod kasagaran nga maayo ra kini sa sulod sa pito ngadto sa 14 ka adlaw, angay gihapon nga mag-amping tungod kay ang uban niini mahimong mosangpot sa seryosong bacterial infection kon dili maatiman og tarong ang personal nga kalimpyo sa lawas.
