Gidakop sa Bureau of Immigration ang usa ka inilang Chinese national sa Ninoy Aquino International Airport (NAIA) samtang kadaghanan sa mga tawo nagsaulog sa Semana Santa.
Sumala sa bureau, ang langyaw gidakop human siya nagpakaaron-ingnon nga usa ka Pilipino gamit ang alyas nga Peter Buenaobra Zhuang.
Giingon nila nga ang Intelligence Service sa Armed Forces of the Philippines nakigtambayayong sa operasyon subay sa tumong nga mapanalipdan ang integridad sa mga dokumento sa Pilipinas.
Nakit-an usab nga ang nadakpan nga suspek nagdala og aktibong Philippine Passport nga mao ang iyang gigamit sa pagbiyahe bisan kung siya usa ka Intsik ug dili Pilipino.
Base sa report sa Intel sa Immigration, nadiskobrehan usab nga gawas sa pasaporte, aduna usab siyay ubang mga dokumento sama sa lisensya sa pagmaneho, birth certificate ug marriage certificate.
Ang langyaw nga nadakpan magpabilin sa kustodiya sa Bureau of Immigration samtang atubangon ang mga kaso nga gipasaka batok kaniya.
