Gipanghimakak sa Ministry of Foreign Affairs sa China nga adunay kalabotan ang ilang gobyerno sa usa ka AI-generated video nga gipagawas sa usa ka state-run media outlet nga naghulagway sa mga Pilipino isip mga unggoy samtang gisaway ang 2016 Arbitral Award sa West Philippine Sea (WPS).
Sumala kang Chinese Foreign Ministry spokesperson Lin Jian, wala siya’y komento bahin sa maong video ug giklaro niya nga dili kini gihimo sa gobyerno sa China.
Bisan pa niini, iyang gipadayon ang dugay nang posisyon sa Beijing nga dili nila giila ang 2016 South China Sea Arbitral Ruling, nga ilang giingong ilegal ug walay bisa.
Samtang, nagpabilin ang baruganan sa Pilipinas sa bisa sa maong desisyon, diin giingon nga walay legal nga basehan ang halapad nga pag-angkon sa China sa giilang ginalalisang katubigan.
Una nang gihangyo sa Department of Foreign Affairs (DFA) ang maong state-run media outlet nga tangtangon ang AI-generated video gikan sa social media.
Gihulagway sa DFA ang maong video isip rasista, makainsulto, ug paglapas sa dignidad sa mga Pilipino.
