Nanghimakak ang China nga magpatuman kini og hugot nga mga lakang human kini mosang-at og pasangil batok sa Estados Unidos sa paglapas sa ilang kasabutan sa “trade truce.”
Matod sa Ministry of Commerce sa China, giuyon sa Amerika ang ilang sabot nga nahitabo sa Geneva niadtong Mayo, diin nagtunol og pagsabot ang duha ka nasud nga mupaubos sa ilang mga taripa. Ang US mipanaog sa ilang taripa gikan 145% ngadto sa 30%, samtang ang China usab mipamubo gikan 125% ngadto sa 10%.
Dugang pa sa China, gilapas usab sa US ang mga naunang sabot nga gikasabutan nila ni Chinese President Xi Jinping ug US President Donald Trump niadtong Enero 2025.
Kini nagpasunod sa pamahayag ni Trump niadtong Biyernes nga nag-akusa sa China nga wala motuman sa kasabutan, bisan wala siya maghatag og detalyado nga ebidensya. Apan matod ni US Trade Representative Hamieson Greer, wala kuno kuhaa sa China ang mga non-tariff barriers sama sa ilang gisabot.
Gipasanginlan usab sa China ang US sa kalit nga hunong sa pagbaligya og software alang sa chip design sa mga Chinese company, pagpahimangno batok sa paggamit sa Huawei chips, ug pagkansela sa mga visa sa ilang mga estudyante.
Bisan pa sa kalisod, nagpabiling bukas ang posibilidad nga magkaistorya pa si Trump ug Xi sa umaabot nga mga adlaw. Sumala ni Treasury Secretary Bessent, gilauman nga masulbad pa ang mga isyu kung magpadayon ang ilang paghinabi.
Sa laing bahin, giingon ni Trump niadtong miaging semana nga iyang ipaduha ang taripa sa import nga asero ug aluminum gikan 25% ngadto sa 50%, sugod Miyerkules, aron mapalambo ang lokal nga industriya ug malikayan ang pagsalig sa China.
