Nagpatigayon ang China og missile test-fire gikan sa ilang nuclear-powered submarine paingon sa Kadagatang Pasipiko ning Lunes, Hulyo 6.
Nakadawat dayon kini og kusog nga pagsaway ug kabalaka gikan sa mga silingang nasod sama sa Japan, Australia, ug New Zealand. Sumala sa mga nasod, makapabalaka ang padayon nga pagpalapad sa China sa ilang kusog militar sa rehiyon.
Gilunsad ang missile mga alas-12:01 sa udto pinaagi sa People’s Liberation Army Navy (PLAN) gamit ang usa ka nuclear submarine.
Ang gilunsad nga missile adunay dummy warhead ug nahulog sa usa ka gitakdang lugar sa international waters sa Kadagatang Pasipiko . Apan, wala gipahibalo sa China ang eksaktong lokasyon diin kini nahulog.
Base sa report, kabahin lamang sa ilang tinuig nga military training ang maong missile launch. Gipatin-aw usab sa gobyerno sa China nga ang maong ehersisyo wala gitumong batok sa bisan unsang nasod o partikular nga target.
Nahitabo ang missile test pipila lamang ka oras human mipirma ang Australia ug Fiji sa usa ka bag-ong defense alliance. Ubos sa kasabutan, misaad ang duha ka nasod nga magtinabangay ug magsuportahay sa usag usa kon adunay hulga o pag-atake nga ilang maatubang.
