GENERAL SANTOS CITY – Padayong nagpakahilom si Police Senior Inspector Nemecio Calipjo, ang gi-relieve nga hepe sa Maasim Municipal Police Station, human matud pa nagpaarak ug armas gumikan sa kahubog miaging gabii.
Apan sa pakighinabi sa Bombo Radyo kang Maasim Acting Mayor Uttoh Salem Cutan, gibutyag niini nga nakahinabi niya si Calipjo ug gisugilon matud pa niini kaniya nga nahimo ang sa ingon gumikan sa kasuko human nga wala mituman kaniya ang mga ginsakpan.
Buot untang tigumon ang mga sakop alang sa ipahigayon nga operasyon, apan walay misipot kanila.
Una niini, kahibaluan nga nalisang ang mga pasyente ug gabantay sa katapad sa presinto nga municipal hospital, ug nagtuo pa nga gisulong na sa mga armado ang lugar gumikan sa nadunggan nga mga buto sa m16 armalite.
Sa karon, matud ni Police Supt. Teody Condesa sa tigpamaba sa Sarangani Police Provincial Office, padayong gipailawom sa imbestigasyon si Senior Inspector Calipjo sa PNP Provincial Command, kung asa mag-atubang kini ug kasong alarm and scandal, indiscriminate firing.
Samtang mibalibad ang naasoy’ng opisyal nga ikumpirma kon tinuod nga lango sa ilimnun si Calipjo dihang gihimo ang pagpaarak ug armas.
Samtang ang mihulip kaniya isip acting chief of police sa Maasim mao ang iyang deputy officer nga si Senior Inspector Wesley Matillano.
