Usa ka taga Sugbo ang nakadaog og lottery jackpot nga mobalor og kapin sa P102 milyones human sa pagpusta sa mga numero gikan sa adlawng natawhan ug edad sa iyang pamilya.
Gikompirmar sa Philippine Charity Sweepstakes Office nga ang swerteng bettor mi-claim sa P102,346,298.00 nga jackpot prize sa PCSO Main Office sa Mandaluyong City niadtong Hunyo 11.
Ang magduduwa sa lottery mipares sa kombinasyon sa Lotto 6/42 niadtong Hunyo 3, nga mao ang 05-22-14-03-23-11.
Matod sa nakadaog, nipusta siya sa usa ka lotto outlet sa South Town Center sa Talisay City niadtong Mayo 27.
Paambit niya nga ang iyang pusta gibase sa mga adlaw nga natawhan ug edad sa mga sakop sa iyang pamilya.
Matud pa sa bag-ong milyonaryo nga plano niya nga gamiton ang kuwarta alang sa edukasyon sa iyang mga anak ug makapanag-iya og kabtangan alang sa ilang kaugmaon.
