Subling nanawagan si Cebu Archbishop-elect Alberto Uy sa hingpit nga pagdili sa online gambling, nga niinsistir nga dili igo ang usa ka regulasyon.
Iyang gihimo ang maong pamahayag sa iyang makatandog nga homily dungan sa ika-171 nga Bohol Day kaniadtong Martes, Hulyo 22.
Gihangyo usab niya ang tanan nga mahimong maisog nga saksi sa paglaum sa komunidad samtang nagbansay sa kamatuoran ug lig-on nga nagbarog taliwala sa nagkagrabe nga disinformation ug kawalay interes sa katilingban.
Ang napiling arsobispo nipahimangno usab sa nagpadayong mga hagit nga giatubang sa katilingban, sama sa korapsyon sa mga buhatan, pagkadaut sa kinaiyahan, ug ang padayon nga pagkagumon sa ilegal nga droga.
Apan siya miingon, dili lang mga droga ang gikaadikan karon lakip na ang online nga sugal ang mikaylap usab.
Dugang pa niya nga nanghinaot siya nga makombinsir si Presidente Ferdinand Marcos Jr. nga ipatuman ang total ban sa maong aktibidad.
Bisan pa nga iyang giila nga ang gobyerno nakakuha ug gamay nga kita gikan sa mga buhis sa online gambling, gipasiugda niya nga “dili buhis ang problema.”
Siya niingon nga aduna igong pundo ug ang tinuod nga problema mao ang sistema sa pagpangolekta ug kaylap nga kurapsyon.
