GENERAL SANTOS CITY – Gihingusgan ni Atty. Rey Cartojano nga angayang sundon o tumanon ang gipagawas nga kamanduan sa Security and Exchange Commission (SEC) batok sa Kabus Padatoon (KAPA) International Ministry Incorportated nga ihunong ang operasyon sa pagkolekta og salapi gikan sa mga tao nga ilang ma-recruit o nahimong miyembro.
Lakip niini ang unsa mang transakyon o kalihukan may adunay kalambigitan ang maong investment group.
Sumala kang Atty. Cartojano, lehitimo og bug-at nga kamanduan ang Cease and Desist order sa SEC nga usa ka regulatory body hinungdan nga angayang dili balewalaon.
Gidugang pa niini nga pwedeng maapil sa contempt proceedings ang mga promoter, agents, representante, recruiter, ang mga namuno sa KAPA apil ang mga miyembro nga padayong ga-invest kung dili musunod sa COD order sa SEC.
Mismong ang SEC na ang mihimo og aksyon pinaagi sa pagpahigayon og kaugalingong imbestigasyon bisan nga walay pormal nga reklamo ang nadawat.
Una nang gibutyag ni SEC Region 10 officer-in-charge Atty. Frederick Enopia nga dili pasalig mapasalig o magarantiya sa SEC kung mabalik pa ngadto sa mga nag-invest ang ilang salapi .
