Gipagawas sa City Disaster Risk Reduction and Management Office (CDRRMO), pinaagi ni Dr. Bong Dacera ang department head sa mao nga buhatan ang datus ug assessment human sa nahitabong kusog nga linog sa dakbayan sa General Santos.
Sumala ni Dr. Dacera, ang CDRRMO ang nagsilbing tig-usa ug tigtigom o consolidator sa tanang report nga naggikan sa nagkadaiyang ahensya sama sa CSWDO ug CHO.
Giklaro usab niya nga ang City Public Information Office (CPIO) lamang ang opisyal nga buhatan nga gitahasan sa pagpagawas niining mga impormasyon aron malikayan ang pagkalat sa sayop nga balita.
Sa pagkakarun mukabat na sa 25,323 ka pamilya ang naapektuhan sa linog.
Samtang anaa sa kapin 73,637 ka mga indibidwal ang apektado Moabot usab sa 22,696 ka mga balay ang partially damaged o nakabaton og ginagmay nga kadaot ug adunay 36 ka mga building sa gobyerno ang nainspeksyon ug gideklarang restricted o dili una pwedeng gamiton.
Samtang sa Business Establishments adunay 84 ang namarkahan og Red o restricted/delikado 85 ang namarkahan og Yellow o for evaluation og 349 ang giisip nga Green o luwas nga balikan.
