Gibantayan sa Catholic Bishops’ Conference of the Philippines (CBCP) ang pag-uswag sa impeachment trial sa Senado, sumala kang Bishop Jose Colin Bagaforo, pangulo sa Episcopal Commission on Inter-Religious Dialogue.
Matod sa Catholic leader, nakabuo na kaniadto ang Simbahang Katolika uban sa ubang relihiyosong grupo sa Inter-religious Leaders’ Council for National Transformation nga aktibong nagmonitor sa mga isyu sa katilingban sama sa impeachment trial.
Sa bahin sa Simbahang Katolika, nagpabilin ang ilang baruganan nga kinahanglan manubag ang bisan kinsa nga gidudahang nakahimog krimen, bisan unsa pa ang iyang posisyon sa gobyerno.
Giklaro usab ni Bishop Bagaforo nga wala nila gikondena ang Bise Presidente o naghatag og pabor o suporta sa bisan kinsang opisyal.
Matod pa niya, ang tumong lamang sa simbahan mao nga maghari ang balaod ug masunod ang proseso nga gitakda sa Konstitusyon.
Gidasig usab sa Catholic leader ang publiko ug mga miyembro sa simbahan nga pasagdan nga mouswag ang impeachment process samtang padayon nga gibantayan ang mga panghitabo sa impeachment court.
Sumala niya, kabahin kini sa gitudlo sa Simbahan nga pagpatuman sa hustisya ug pagpanubag, nga mao usab ang duha sa mga prinsipyo nga gipasiugda sa Catholic Church.
