Hugot nga gihimakak ni Senate Minority Leader Alan Peter Cayetano ang pasangil ni Senador Panfilo “Ping” Lacson nga adunay mga “ghost projects” sa Taguig, ug gihagit kini nga magpakita og ebidensya aron mapamatud-an ang iyang akusasyon.
Sa usa ka pamahayag, miingon si Cayetano nga daghang mga ahensya sa gobyerno ang nakainspeksyon na sa mga proyekto sa Taguig sa makadaghang higayon, apan wala gayud silay nakitang mga “ghost projects.”
Sumala sa senador, bisan ang iyang opisina naghimo sa kaugalingong beripikasyon sa dihang migawas ang mga pasangil sa korapsyon nga nalambigit sa mga proyekto sa gobyerno.
Matod niya, kanunay nilang gisusi ang kahimtang sa mga proyekto aron masiguro nga nahuman kini, ug nga ang mga wala pa mahuman adunay igo nga pondo aron mapadayon ang implementasyon.
Gipasabot usab ni Cayetano nga ang “ghost project” nagtumong sa usa ka proyekto nga nabayran na sa gobyerno apan wala gayud matukod o mapatuman.
Sa samang higayon, giawhag ni Cayetano ang Department of Public Works and Highways, ubos sa pagpangulo ni Secretary Vince Dizon, nga mandoan ang tanang district engineers ug, kon mahimo, bisan ang mga local government units, sa pagkuha og mga litrato ug pagdokumento sa tanang flood control projects aron dali nga mailhan kon adunay mga proyektong wala gyud mapatuman.
Giinsistir usab niya nga kon mapamatud-an ang paglungtad sa mga “ghost projects,” ang mga responsable kinahanglan nga manubag sa balaod, bisan unsa pa ang ilang posisyon sa gobyerno.
Gipasiugda pa ni Cayetano nga ang giingong pagtutok ni Lacson sa Taguig kinahanglan usab nga ipares sa imbestigasyon sa ubang mga lokal nga kagamhanan nga nakasinati og dagkong problema sa pagbaha.
Matod niya, ang mga flood control projects sa ubang mga siyudad ug probinsya kinahanglan usab nga susihon aron masiguro nga patas ug dili bias ang mga imbestigasyon, ug dili lamang nakatutok sa piho nga mga lugar o personalidad.
Matud pa sa mga naunang pahayag, giakusahan ni Lacson si Cayetano nga adunay mga “ghost projects” sa Taguig, taliwala sa ilang mainit nga pagbayloay og mga pahayag bahin sa isyu sa flood control ug sa nagpadayon nga impeachment trial ni Bise Presidente Sara Duterte.
