Nanawagan si Senate Minority Leader Alan Peter Cayetano nga dili na himuon og intriga ang iyang mubo nga biyahe sa Singapore uban sa iyang igsoon nga si Sen. Pia Cayetano.
Nibalik na sa nasod niadtong Sabado ang mag-igsuon human sa ilang biyahe nga gihulagway ni Cayetano nga usa lamang ka ordinaryo ug hilom nga pagbiyahe.
Sa usa ka pahayag, giingon sa manghod nga Cayetano nga wala niya damha nga mahimong dakong isyu ang ilang biyahe ug gikasubo niya nga nahimong personal ang mga panaghisgot.
Matud niya, usa sa problema ang gitawag niyang “toxic” nga palibot diin daghan ang nangita og intriga ug sige og lalis.
Una nang giingon ni Sen. Pia nga dugay na niyang giplano ang pag-adto sa Singapore aron suportahan ang national team sa Asia Pacific Padel Tour.
Gikumpirma usab sa Bureau of Immigration o BI nga migawas sa nasod ang mag-igsuon niadtong Miyerkules.
Samtang, giingon ni Sen. Panfilo “Ping” Lacson nga dili isyu sa pagkakaron ang biyahe ni Alan Peter ug angay kini hatagan og higayon nga makapahulay gikan sa stress nga resulta sa mga isyu nga siya mismo ang nakamugna.
Nagpadayon ang panaglalis nila Cayetano ug Lacson may kalabotan sa mga alegasyon sa iregularidad sa flood control ug reclamation projects sa Taguig City.
Una nang misumite si Lacson sa Office of the Ombudsman og dili moubos sa 45 ka case studies nga gisuportahan sa mga opisyal nga dokumento kalabot sa giingong “systemic anomalies” sa mga proyekto sa flood control infrastructure sa maong siyudad.
Samtang, giisip ni Cayetano ang mga lihok ni Lacson isip pagpanglutos dili lamang batok kaniya kondili batok usab sa iyang pamilya ug sa Taguig City.
Giingon ni Cayetano nga iyang gitugyan na sa Diyos ang mga kasong giatubang, imbestigasyon, intriga ug mga alegasyon nga matud niya padayon usab og kausaban.
Giimbestigahan usab si Cayetano sa National Bureau of Investigation o NBI may kalabotan sa giingong mga iregularidad sa pag-host sa Pilipinas sa 2019 Southeast Asian Games.
Sumala kang NBI Director Melvin Matibag, posible nga maapil si Cayetano isip respondent sa mga kasong mahimong irekomenda sa bureau ngadto sa Department of Justice.
Lakip sa giimbestigahan ang giingong P10 bilyong unliquidated funds, kakulang sa competitive bidding sa pipila ka mga proyekto ug ang kontrobersiyal nga P50 milyones nga cauldron.
Samtang, giakusahan usab ni Cayetano si Matibag nga misulay og hadlok kaniya isip senator-judge sa impeachment trial ni Vice President Sara Duterte.
