Nisang-at ang mga otoridad og qualified human trafficking complaint batok kang Cassandra Li Ong, ang awtorisadong representante sa POGO hub Lucky South 99 ug 53 ka uban pa kalabot sa giatake nga ilegal nga POGO sa Porac, Pampanga.
Ang Presidential Anti-Organized Crime Commission (PAOCC) ug ang Philippine National Police-Criminal Investigation and Detection Group (PNP-CIDG) nisang-at sa maong reklamo ngadto sa Department of Justice .
Ang mga respondents lakip na si Ong giakusahan sa paglapas sa Republic Act No. 9208 o ang Anti-Trafficking in Persons Act.
Matod ni Justice Undersecretary Nicky Ty, si Ong natumbok nga usa sa mga respondents tungod sa iyang kalambigitan sa Whirlwind Corporation, nga nag-abang sa property diin nahimutang ang Lucky South 99 .
Matod pa niya nga makita sa mga ebidensya nga nahipos nga si Ong maoy nagpadagan sa Lucky South 99 .
Pipila sa mga gitubag sa reklamo mao ang Chinese national nga si Duanren Wu, kinsa giingong big boss sa gironda nga POGO ug executive sa Whirlwind Corporation, uban nila ni Lucky South 99 corporate secretary Ronalyn Baterna, kanhi company president Stephanie Mascarenas ug kanhi Technology and Livelihood Resource Center (TLRC) deputy director general Dennis Cunanan ingon man ang Singaporean national nga si Zhang Jie nga kanhi presidente sa Lucky South 99 Outsourcing ug uban pang incorporator.
