Kumpiyansa ang kanhi world champion John Riel Casimero nga maka atbang pag usab si Japanese undisputed world champion Naoya Inoue.
Sa iyahang post sa social media, maisugon niyang giingnan si eight-division world champion Manny Pacquiao nga ipresentar niya si Inoue tungod mao ra kini ang makadaut sa record sa Japanese fighter.
Kini nga pamahayag ni Casimero nahitabo human ang Top Rank Promotions chief Bob Arum mitandi sa Peoples champ ug sa Japanese fighter, nga nagkanayon nga mas legendary ang career ni Inoue itandi kang Pacquiao.
Maong mibanat dayon si Casimero sa pagtubag sa gisulti ni Arum.
Kahinumduman nga sa usa ka interview, si Arum niingon nga dako ang iyang respeto kang Pacquiao tungod sa mga kalampusan nga iyang naangkon sa iyang boxing career. Hinuon, ang American promoter miinsister nga mas mabulokon ang boxing career ni Inoue, butang nga nakapataas sa kilay sa pipila ka boxing analysts ug fans.
Gitumbok ni Arum ang limpyo nga rekord ni Inoue nga wala’y pilde gikan sa 29 ka away.
Sa laing bahin, si Inoue kasamtangang naghupot sa titulo sa World Boxing Association (WBA), World Boxing Council (WBC), International Boxing Federation (IBF) ug World Boxing Organization (WBO) sa super bantamweight class.
