Nag-abot na sa France ang ginabansagan nga “Golden Boy” sa Philippine Team nga si Carlos Yulo sinemana una ang pag-arangkada sa Paris Olympics.
Gi-abi-abi sa Philippine Embassy officials ug mga miyembro sa Filipino community si Yulo nga kauban ang iyang head coach nga si Aldrin Castaneda ug sports occupational therapist nga si Hazel Calawod.
Sumala sa kanhi two-time world champion, gamiton niini ang oras sa training facility sa Metz aron magmaayo pa gyud ang iyang performance partikular ang iyang stamina.
Kahinumduman nga kaniadtong Sabado dihang miabot ang una nga batch sa Pinoy Olympians sa Metz aron nga makaandam sa Olympiada.
Kaniadtong Mayo, upat usab ka gold medals ang nakuha sa nasangpit nga Filipino gymnast sa 2024 Asian Gymnastics Union Men’s Asian Artistic Gymnastics Championships sa Uzbekistan.
Magasugod ang Paris Olympics 2024 sa Hulyo 26.
