GENERAL SANTOS CITY – Duha ka motibu ang gitutukan sa kapulisan kalabutan sa pagkakaplag sa patay nga lawas sa usa ka caretaker sa usa ka luna sa San Jose ning dakbayan.
Matud ni Police Chief Instr. Nestor Maderse Jr nga ila pang gipangita ang kainum sa biktima una kini nawala ug nakaplagan nga patay.
Gikumpirma niini nga sa milabay nga mga adlaw midangop sa ilang presento ang tag-iya sa luna ug nagbutyag nga nawala ang piyado niini human nga nakig-inum sa iyang mga kaila, ila matud pang gipangita didto sa lugar apan wala nila makita.
Kagahapong adlawa laing taho ang midangat sa presento sa Fatima kalabut sa nakit-ang patay nga giputos ug malong.
Didto na nahibaw-an nga kadtong gikataho nga nawala nga caretaker ang ilang nakita.
Giila niini ang biktima nga si Raul Sainal Hasu-an 42 bulag sa asawa ug molopyo sa Lumakil, Polomolok South Cotabato.
Matud sa opisyal nga dili pa matino kung gitigbas ang biktima tungod gipaabut pa ang resulta sa imbestigasyon sa SOCO team.
Matud sa opisyal nga naa sa punerarya ang patay nga lawas sa biktima.
