GENERAL SANTOS CITY – Padayong ginamonitor ug giimbestugahan sa Philippine Drug Enforcement Agency kon PDEA-12 ang greport kalabot candy-like drug nga strawberry quick.
Sa pakighinabi sa Bombo Radyo GenSan kang Kat Abad, tigpamaba sa PDEA-12, gibutyag niini nga ang shabu ug marijuana ang kasagaran nga anaa sa rehiyon samtang sa ecstacy kaniadtong 2014-2015 pa ulahing may nakumpiska nga maong matang sa iligal nga droga.
Apan sa karon wala matud pa silay nadawat nga impormasyon nga nakasulod na GenSan ang candy-like drug nga strawberry quick.
Kini human nga dili pa lamang dugay nga nagpahimangno ang PDEA-11 sa mga ginikanan nga mahim0ng alerto para sa ilang mga anak batok sa naasoy nga matang sa iligal nga droga.
Bisan pa man, wala gibalewala sa PDEA-12 ang posibilidad nga makasulod kini sa syudad o nag-circulate na.
Gumikan niini, nagpahimangno ang PDEA-12 sa mga ginikanan nga imonitor gayud ang ilang mga anak hilabina nga kung estudyante.
