GENERAL SANTOS CITY – Magkatigom ang nahibiling mga pamilya sa mga biktima sa mangilngig nga masaker dinhi sa dakbayan partikular sa Forest Lake Cemetery sa Brgy. Apopong.
Kini kalabutan sa gikatakdang pagpagawas sa promulgasyon sa multiple murder case sa sala ni Quezon City RTC Branch 221 Presiding Judge Jocelyn Solis-Reyes batuk sa mga akusado.
Alas 8:00 sa buntag ipahigayon ang candlelighting ceremony, pag-ampo og paghalad og bulak sa markers sa mga biktima samtang magpaabot sa promulgasyon sa desisyon sa kaso.
Magbutang og wide screen aron makit-an sa media og mga pamilya ang live coverage sa pagpakanaug og hukom.
Gibutyag sa Bombo Radyo GenSan ni Elliver Cablitas, bana sa namatay nga si Marites Cablitas, nga miabot na gyud ang adlaw nga ilang gipaabot makalabay ang napulo ka tuig.
Sa pamahayag niini nga iampo niya si Judge Reyes nga unta magpagawas og paborableng desisyon alang sa mga pamilya sa mga biktima nga gi-uhaw sa pagkab-ot og hustisya.
Nasayran nga 12 ka biktima sa masaker ang gilubong sa Forest Lake Cemetery.
