GENSAN- Gipasiugda ni Judith Janiola, City Population Officer, ang dakong epekto sa bullying sa pangisip ug emosyonal nga kahimtang sa mga kabatan-onan, ilabina human sa pagpamusil nga nahitabo sa usa ka tulunghaan sa Tacloban City diin duha ka menor de edad ang nalambigit isip mga suspek.
Sumala kaniya, usa sa labing kasagarang problema nga giatubang sa mga batan-on karon mao ang bullying nga sa kasagaran wala pa matagad og igo.
Matod ni Janiola, gawas sa mga insidente sa kapintasan, adunay mga batan-on usab nga moabot sa punto sa paghikog tungod sa dili na nila maagwanta nga pagpakaulaw ug pagpangdaot nga ilang masinati sa eskwelahan ug sa ilang palibot.
Gipasabot niya nga ang bullying kasagarang magsugod sulod sa pamilya ug mahimong mopadayon ngadto sa komunidad, eskwelahan ug uban pang lugar diin nagalihok ang usa ka tawo. Dugang pa niya, adunay direktang epekto kini sa sikolohikal, sosyal ug mental nga kahimtang sa biktima.
Kon mapundok na ang kasakit, kasuko ug kapungot nga gibati sa usa ka tawo, mahimo kining mosangpot sa dili maayong mga desisyon ug dili gitinguhang mga panghitabo.
Ang pahayag ni Janiola misunod sa inisyal nga imbestigasyon sa mga otoridad nga nagpakita nga posible matod pa nakasinati og bullying ang mga menor de edad nga suspek sa maong pagpamusil.
