Mibuto pag-usab ang Bulkang Kanlaon sa isla sa Negros pasado alas siyete sa kagabie Pebrero 26, 2026. Sumala kang Jigz Santiago, konsehal sa Canlaon City sa Negros Oriental, kusog ang ilang nadungog nga pagbuto sa bulkan.
Sa laing bahin, sa kuha sa CCTV sa Barangay Mansalanao sa lungsod sa La Castellana, Negros Occidental, madungog ang kusog nga pagbuto ug makita usab ang pagdagan sa pipila ka residente nga nahadlok sa kalit nga pag-alboroto sa bulkan.
Sa advisory sa Philippine Institute of Volcanology and Seismology o PHIVOLCS, gipahibalo nga nagpadayon ang moderately explosive eruption sa Kanlaon Volcano sa Negros Island Region.
Alas 8:30 sa gabii, adunay mga lugar nga duol sa bulkan nga nagsugod na og ulanon og abo. Sa usa ka video nga narekord sa Barangay Camandag sa La Castellana, klarong makita ang pag-ulan sa abo nga nakatabon na sa mga sakyanan ug garahe sa mga residente.
Padayon ang pagbantay sa mga otoridad sa kahimtang sa bulkan samtang gipahimangnoan ang mga residente nga mag-amping ug mosunod sa mga advisories alang sa ilang kaluwasan.
