Nagpaabot ug pahimangno ang pamunuan sa Bulaong Terminal sa dakbayan sa General Santos alang sa mga pasahero nga mabiyahe sa Kalag-kalag 2025, ilabi na samtang gilauman ang pagdagsa sa mga tawo nga mopauli sa ilang tagsa-tagsa ka probinsya aron mobisita sa ilang mga minahal sa kinabuhi nga namatay.
Sumala ni Raymond Albert Ledesma, acting section chief sa Bulaong Terminal, andam ang ilang mga personahe aron masiguro ang hapsay nga dagan sa biyahe ug kaluwasan sa mga pasahero. Gipahugtan usab ang pagbantay sa mga bus, van, ug ticketing area aron malikayan ang kasamok, siksikan, ug overloading.
Gipasidaan ni Ledesma ang publiko nga mouna sa terminal, bantayan ang ilang mga gamit,. Gipasabot usab niya nga nagtinabangay na sila sa City Traffic Management Office ug General Santos City Police Office aron mapadayon ang kalinaw ug kahapsay sa sulod ug palibot sa terminal.
Dugang pa niya, adunay mga help desk ug information booth nga magtabang sa mga pasahero, ug hugot nga ipatuman ang mga lagda sama sa pagdili sa pagdala ug ilimnong makaubog , sigarilyo, armas, ug ubang delikadong butang.
Giawhag sa pamunuan sa Bulaong Terminal ang tanan nga biyahero nga magpuyo sa disiplina, pag-amping, ug pagpangandam aron mahimong hapsay, luwas, ug malinawon ang ilang pagbiyahe karong Undas 2025.
