Gipanghimakak ni Senator Christopher Go ang mikatag nga balita online nga mipanaw na si kanhi Pangulong Rodrigo Duterte.
Sa nakalabay nga adlaw mikatag ang mga video nga unod niini ang mga hinimohimo nga istorya kalabotan sa matud pa pagpanaw ni ex-PRRD nga sa nakaalarma usab sa pipila ka netizen.
Apan sa gipagawas nga video ni Sen. Go nga nagsilbi nga special assistant sa kanhi Pangulo, gibutyag niining buhi kaayo ug kusgan pa ang kanhi presidente.
Makita usab sa video nga kauban sa Senador ang kanhi Pangulo nga kasamtangang anaa sa iyang balay nga naga-relax human nga magretiro na kini gikan sa politika.
Gibutyag usab sa kanhi Pangulo nga tigulang na siya ug dili malikayan nga magsakit.
Si Duterte, 79 anyos na ning tuiga ug ang pinakatigulang nga nahimong presidente sa Pilipinas niadtong siya 71 anyos.
Samtang, gitambagan usab ni Senador Go ang mga Pilipino nga mag-amping sa fake news.
