GENSAN – Gitawag ni Atty. Rogelio Garcia nga klarong porma sa pork barrel ang giingong budget insertion nga gibutyag ni Batangas Rep. Leandro Leviste may kalabotan sa mga proyekto sa DPWH nga gisulod sa 2025 National Budget pinaagi sa gitawag nga discussional o allocable funds.
Matud sa abogado nga ang maong pamaagi naghatag og pribilehiyo sa mga magbabalaod aron makasingit og pondo alang sa ilang tagsa-tagsa ka distrito.
Giingon pa ni Garcia nga kon tinuod ang mga pahayag ni Rep. Leviste ug ni Senador Panfilo Lacson nga misupak pa gani sa pagpirma sa bicameral conference committee report tungod sa giingong budget insertions nga mokabat og kapin P256 bilyon sa DPWH ug dugang pang mga alokasyon sa lain-laing sektor.
Kini nagpakita nga ang mga pondo gigamit isip grant aron adunay bahin ang mga lawmakers sa mga proyekto sa gobyerno, bisan pa man nga klarong gimando na sa Korte Suprema nga ilegal ug supak sa Konstitusyon ang pork barrel.
Sumala pa ni Garcia, ang paggamit sa allocable funds usa lamang ka paagi aron malikayan ang balaod ug makapadayon sa pagkuha og pondo gikan sa national budget pinaagi sa mga tinagong insertion.
