Gipahimangnoan sa Bangko Sentral ng Pilipinas o BSP ang publiko nga ilegal ang paghimo og kopya sa mga lokal nga banknote o papel nga kwarta nga walay pagtugot gikan sa institusyon.
Gipatin-aw sa BSP nga ang pag-reproduce sa Philippine banknotes nga walay awtorisasyon supak sa balaod, busa dili mahimong gamiton isip bayad ang mga photocopy sa peso bills sa pagpalit og mga baligya.
Ang pahimangno sa sentral nga bangko migawas human mikaylap sa social media ang mga post nga nag-angkon nga mahimong dawaton isip legal tender ang mga photocopied nga kwarta.
Gisubay kini sa usa ka pahayag ni Atty. Amando Virgil Ligutan, usa ka prosecution counsel sa impeachment trial ni Vice President Sara Duterte, diin iyang gihisgutan nga ubos sa pipila ka legal nga kondisyon, ang photocopied nga dokumento mahimong mahimong orihinal nga ebidensya sa korte.
Apan gipatin-aw sa BSP nga lahi ang aplikasyon sa maong legal nga konsepto ug dili kini nagpasabot nga mahimong gamiton ang photocopy sa kwarta isip tinuod nga bayranan sa adlaw-adlaw nga transaksyon.
