GENERAL SANTOS CITY – Dismayado si Brgy. Captain Jessielito Martinez sa Poblacion Kiamba, Sarangani Province sa pagpagawas sa narco list nga gipagawas sa PDEA kalabot sa mga barangay officials nga nalambigit sa iligal nga droga human nga naapil ang iyang pangalan.
Sa pakighinabi sa Bombo RAdyo, gibutyag niini nga 2016 pa dihang nag-surface tungod sa paggamitan niya og iligal nga droga.
Sukad matud pa niadto hangtud karon, wala na mibalik sa maong bisyo ug nakatutok ang atensyon sa pagsuporta sa mga programa ni Pangulong Duterte ilabina ang kampanya kontra iligal nga druga.
Gani, gakuyog siya sa mga raid nga gipahigayon sa kapulisan og ga-witness.
Gibutyag niini, angayan unta nga giagi ug due process pinaagi sa pagpasaka og kaso kung ugaling aduna may ebidensiya og wala na lamang gipagawas ang narco list.
Tungod niini, na-low-morale ang iyang pamilya apan wala nay mabuhat.
Luyo, gipasalig ni Martinez nga ipadayon ang maayong pagserbisyo sa iyang gisakupan.
Angayan matud pang kaniadto pa gipagawas ang maong listahan ug dili karong paduol sa barangay election.
