GENERAL SANTOS CITY- Dul-an P300,000 nga kantidad sa shabu ang narekober sa mga otoridad sa gipahigayon nga Search Warrant operation kagahapon sa kaadlawon sa panimalay sa barangay kapitan sa Barangay Poblacion, Kabacan, North Cotabato.
Balhug ang nasampit nga barangay kapitan nga si Nestor Salama, 47-anyos, nga gikonsiderang usa ka ‘high cakue target’, ug asawa niini nga si Norhata Salama, 42-anyos, nga usa usab matud pa ka watchlisted person, pulos mga residente sa Mercado Street sa nasampit nga lugar.
Gipahigayon ang operasyon sa hiniusang pwersa sa PDEA-12, PDEA-ARMM, Kabacan Municipal Police Station, 4th Special Action Force (SAF)- Special Action Battalion (SAB) ug 7th Infantry Battalion, Philippine Army.
Nagpositibo ang panimalay sa kapitan sa mga shabu, assorted drug paraphernalia, mga armas ug bala, cards, resibo ug mga salapi nga gituuhang gikan sa ilang illegal drug business.
Gawas sa magtiayon, sikop usab ang duha ka laborer nga giilang sila si Kabunto Batunan, 39-anyos, nga taga-Kabacan, Cotabato ug Johari Zombaga, 20-anyos, taga Pikit, Cotabato.
Ang mga dinakpan nag-atubang ug kasong pagsupak sa Section 5, 11, ug 12 sa Article 2 sa RA 9165 o Comprehensive Dangerous Drugs Act of 2002, ug RA 10591 kon illegal possesion of firearms and ammunition.
Kasamtangan silang balhug sa PDEA ARMM Detention Facility.
