GENERAL SANTOS CITY – Hustisya ang singgit sa pamilya sa barangay kagawad sa Brgy Rubber Polomolok, South Cotabato, human gipusil-patay sa riding in tandem kagahapon sa buntag.
Kahibaluan nga may suspek na ug lead nga gihuptan ang Polomolok Municipal Police Station sa pagpusil-patay kang Brgy Kag. Jimuel Cariaga.
Sa imbestigasyon, alas-8:00 kagahapon sa buntag gikan matud pa sa munisipyo ang biktima kauban ang iyang misis ug pauli na dihang gitaparan matud pa sa riding in tandem ug gipusil ang biktima.
Naigo si Carriaga sa ulo ug lawas, kung asa nadala pa sa balay-tambalanan apan nakabsan gihapon sa kinabuhi.
Natapsingan usab ug bala sa dughan ang iyang asawa. Caliber 45 pistol matud pa ang gigamit sa mga suspek.
Gikabutyag sa kapulisan nga personal grudge ug may kalabutan sa trabaho niini sa barangay ang usa sa ilang ginatutukan nga anggulo sa krimen, kung asa nasayran nga kaniadto pa nakadawat ug bahad sa kinabuhi ang biktima.
Nakaluwas usab matud pa sa pagpamusil ang pamilya niini kaniadtong Hunyo miaging tuig.
Nagpadayon pa ang imbestigasyon sa kapulisan kalabot sa nasampit nga krimen.
