GENERAL SANTOS CITY – Gibati og kalisang ang mga lumolopyo palibot sa Bautista Street Barangay North ning syudad human nga nakauli diretso sa ilang balay ang Locally stranded Individual nga wala man lang miagi sa quarantine.
Wala kapugngi ni Kapitan Raniel Gonato sa Brgy. North nga ipasibaw ang kalain niya sa buot dihang sila sa barangay ang wala gipahibalo sa pag-uli sa 64-anyos nga lalaki sa ilang balay gikan sa Camotes Island, Danao City Cebu.
Nakuratan na lang siya dihang gipadangat kaniya ang report kalabot sa pag-uli sa maong LSI sa ilang balay.
Giadtuan ang maong LSI og dili pa unta kini mukuyog apan napasugot human nga gidad-an og mga pulis.
Sa pamahayag ni Kapitan Gonato nga gisultihan pa sila sa maong LSI nga ka-batchmate sila ni Dr. Bong Dacera, labaw sa City Disaster Risk Reduction and Management Office og nagkaistorya na sila sa nasampit.
Sa karon naka-quarantine na ang nasampit nga LSI sa usa ka pension house sa Brgy. East ning syudad.
Isip amahan sa Brgy. North gusto niining masiguro nga ang kaluwasan sa tanang naniamuyo batuk sa virus.
