Gisaulog karon nga Hulyo 6, 2026 sa Bombo Radyo Philippines ang ilang ika-60 anibersaryo, nga nagtimaan sa unom ka dekada sa walay hunong nga serbisyo sa katawhang Pilipino pinaagi sa matinud-anon, paspas, ug kasaligan nga pagbalita.
Sukad sa pagkatukod niadtong Hulyo 6, 1966 ni Don Marcelino M. Florete Sr. ug sa kasamtangang pagpangulo ni Dr. Rogelio M. Florete isip Chairman, mitubo ang Bombo Radyo gikan sa usa ka estasyon ngadto sa labing lig-on ug labing kasaligan nga radio network sa nasod, nga karon adunay 32 ka fully digitalized nga AM ug FM stations sa 25 ka dagkong lugar sa Pilipinas.
Sa sulod sa unom ka dekada, nahimong importante nga bahin sa kinabuhi sa minilyon ka Pilipino ang Bombo Radyo isip kasaligan nga tinubdan sa balita, impormasyon, komentaryo, ug serbisyo publiko ilabi na sa panahon sa kalamidad, eleksyon, ug krisis sa nasod.
Labaw pa sa broadcasting, nagpadayon usab kini sa paghatag og mga programa sama sa Bombo MEDICO, DUGONG BOMBO, ug BOMBO MUSIC FESTIVAL nga nagpalambo sa serbisyo sa komunidad ug Original Pilipino Music.
Giila usab ang network sa nagkalain-laing institusyon tungod sa kahanas niini sa journalism, lakip ang mga awards gikan sa Catholic Mass Media Awards ug Rotary Club of Manila. Sa pagselebrar sa ika-60 anibersaryo, gipakusog sa Bombo Radyo Philippines ang ilang saad nga magpabiling numero uno ug kasaligan nga tinubdan sa balita ug impormasyon para sa tanang Pilipino, nga nagpadayon sa patas nga pagbalita ug makahuluganong serbisyo publiko.
