GENERAL SANTOS CITY – Mapasalamaton ang Bombo Radyo GenSan, human nga nagmalampuson ang natigayon nga Bombo Radyo Bancarera: Sarangani Bay Festival 2018 edition, kagahapong adlawa, sa Gumasa, Glan, Sarangani Province.
Kini human sa nahimong mainiton nga pagdawat ug pagsuporta sa tanan sa nasampit nga programa, kung asa nahimong jampacked ang Gumasa Beach gumikan sa midagsa nga katawhan nga mitan-aw sa kulbahinam nga lumba sa mga bangkang de motor.
Kanya-kanya ug cheer ang tanan sa ilang gisuportahan nga banca rider, apan mipatigbabaw gayud ang kamaayo ni Marven Roldan sa Team Jeric gikan sa Sinalang, Maasim, Sarangani, sa kapin 30 niya ka mga kaatbang nga banca riders, human nasakmit ang kampeonato.
Isip kampeon, nadag-an niya ang P50,000 nga cash prize, trophy, brand new digital nga makina, ug mga fishing supplies. Samtang, first runner-up Justine Grado sa Team Magnetic gikan sa Sta. Maria, Davao Occidental, nga nakadawat ug P30,000 nga cash prize, trophy, ug marine supplies.
Second runner-up si Sam Bastida sa Team Reysback gikan sa Bunawan, Davao.
Samtang ang mga non-winners ang nakadawat ug tig-P2,000 nga consolation prize.
Nakadawat siya ug P20,000, trophy. Dungan niini, gipasalamatan usab sa sibyahanan ang lokal nga panggamhanan sa Sarangani, sa pagpanguna ni Gov. Steve Chongbian Solon, sa walay puas nga pagsuporta sa maong programa sa Bombo Radyo, matag Sarangani Bay Festival.
