GENERAL SANTOS CITY – Naghinam-hinam na ang pamilya ice cream vendor nga si Marcelino Entia Jr. gumikan ugmang adlawa, Sabado, i-turnover na kanila ang house and lot nga gisaad ni Sen. Manny Pacquiao nga ihatag kanila.
Sama sa iyang bana, daw dili usab matud pa makatuo si Mrs Ruby Entia sa dakong swerte nga miabot sa ilang kinabuhi.
Ug gani, sa pakighinabi sa Bombo Radyo, giangkon niini nga sa una wala gilayong nagtuo sa gisulti sa iyang bana kaniadtong Dominggo nga nagkahimamat sila sa idolo, nga maoy naghatag sa dakong kantidad nga gidala pauli sa iyang bana kaniadtong adawa, ug gisaaran pa nga hatagan ug house and lot.
Karon pa gayud matud pa misulod sa iyang alimpatakan nga tinuod na gayud ang tanan, hilabi na nga nakaatubang na niya ang senador, ug nakasalo pa gayud nila sa panihapon sa mismong mansyon niini, butang nga wala gayud sila nagdahum nga mahitabo. Kini gumikan sa TV lang matud pa nila makita si Sen. Pacquiao kaniadto.
Dungan niini, nagpasalamat si Mrs Entia sa Diyos, sa senador, ug sa tanan nga nahimong instrumento ug nahimong kabahin sa paghatag kanila ni Sen. Pacquiao sa dakong grasya, partikular na si Ms. Jen Manilay ug pamilya niini, lakip ang Bombo Radyo nga maoy nangita kanila, ug mitabang alang sa subli nilang panagkita sa senador kaniadtong Miyerkules sa gabii.
Dungan niini, misaad usab si Mrs. Entia nga ampingan ug palambuon ang unsa mang gihatag kanila ni Pacquiao.
