Nangayo ang Bureau of Customs o BOC sa Department of Justice og Immigration Lookout Bulletin Order o ILBO batok sa 13 ka tawo nga giatubang og criminal complaints may kalabotan sa giingong agricultural smuggling.
Tumong niini nga mamonitor ang ilang pagbiyahe gawas sa nasud samtang nagpadayon ang imbestigasyon.
Lakip sa mga giila ang owner ug mga representante sa importer, usa ka customs broker, ug siyam ka opisyal ug empleyado sa BOC nga giingong konektado sa mga shipment.
Matod sa BOC, posible pang modugang ang listahan kung adunay uban pang tawo nga mailhan nga nalambigit sa maong kaso.
Naggikan ang kaso sa mga shipment nga miabot niadtong Hunyo 2025 ug gideklarar nga “Chicken lollipops,” apan giingong adunay sulod nga 15,029 ka sako sa puti nga bombay ug 2,164 ka kahon sa carrots.
Wala usab giingong adunay gikinahanglang sanitary and phytosanitary import clearance ang maong mga produkto.
Gipasabot sa Bureau of Immigration nga ang ILBO alang sa travel monitoring lamang ug dili awtomatikong nagdili sa usa ka tawo sa paggawas sa nasud.
Matud sa BOC, gamiton niini ang tanang legal nga pamaagi batok sa bisan kinsa nga mapamatud-ang nalambigit sa giingong smuggling scheme.
