Tututukan sa Senate Blue Ribbon Committee ang mga substandard ug palpak nga mga proyekto sa imprastraktura sa gobyerno, human sa mga taho bahin sa mga istrukturang dali ra madaot human sa pag-ulan ug mga bagyo.
Matud ni Senate Blue Ribbon Committee Chairman Erwin Tulfo, kabahin kini sa mas lapad nga imbestigasyon sa komite sa mga alegasyon sa korapsyon sa mga proyekto sa gobyerno.
Gawas sa mga bag-ong ngalan ug mga isyu nga may kalabotan sa mga flood control project, giingon ni Tulfo nga tagsa-tagsa nilang susihon ang mga tulay, kalsada ug uban pang pampublikong pasilidad nga giingong wala makatuman sa gitakdang mga sumbanan.
Giinsistir ni Tulfo nga posibleng timailhan sa korapsyon ang mga proyektong gipondohan sa gobyerno apan wala mahuman o dili husto ang pagkahimo.
May kalabotan niini, nakigkoordinar na usab ang komite sa Department of Public Works and Highways kon DPWH ug uban pang may kalabotang ahensya alang sa pagpahigayon sa imbestigasyon.
Lakip sa ilang tututukan ang pagkaguba sa retaining wall sa EDSA-Ayala northbound sa Makati City human sa sunod-sunod nga mga bagyo, nga hinungdan sa grabeng pagsamot sa kahuot sa trapiko.
Gipunto usab sa senador ang pagkondena ni DPWH Secretary Vince Dizon sa insidente human mogawas ang impormasyon nga hardiflex matod pa, imbes nga lig-on nga mga materyales, ang gigamit sa naguba nga bahin sa estruktura.
Samtang, gipatin-aw ni Tulfo nga dili lamang mga flood control project ang tututukan sa Blue Ribbon Committee, tungod kay susihon usab niini ang uban pang pending nga mga isyu sa korapsyon sa nagkalain-laing ahensya sa gobyerno.
Matud sa senador, mahimong istrikto ang komite sa pagkuha sa mga ebidensya ug siguruhon nga ang mga imbestigasyon pagahimoon subay sa mga lagda sa Senado ug sa naglungtad nga balaod.
