Mibalik si US Secretary of State Antony Blinken sa Middle East aron nga matutukan ang diskusyon sa ginaduso nga ceasefire proposal sa Estados Unidos sa Amerika sa gyera tali sa Israel ug Hamas.
Nakigkita na kini kang Egyptian President Abdel Fattah el-Sisi sa Cairo kung asa giusob niini ang panawagan sa Palestinian group nga Hamas nga dawaton ang truce proposal ni President Joe Biden nga giplastar sa nakalabay nga pa nga Mayo.
Gibasol usab niini ang Hamas nga mao ang nagpalugway sa gyera tungod wala niini gidawat ang proposal.
Naglangkob sa maong proposal mao ang unom ka semana nga ceasefire sa gyera ug pagpagawas sa mga Israeli hostages sa Gaza ug Palestinian prisoners sa Israel ug paghatag ug dalan sa negosasyon alang sa permanenteng ceasefire.
Bisan gina-insister sa US officials nga ginadawat sa Israel ang proposal, may Israeli officials lakip mismo si Prime Minister Benjamin Netanyahu nga nagbutyag nga padayunon nila ang gyera hangtud nga mapulbos ang militante nga grupo.
Nagkita usab si Blinken ug Netanyahu ug naka-schedule usab sa dugang nga diskusyon sa Qatar ug Jordan karong semana.
Karong buntag dihang giaprubahan sa United Nations Security Council ang maong proposal sa US.
Anaa sa 14 ka myembro ang nagboto pabor samtang nag-abstain usab ang Russia.
