Nipasalig ang Department of Agrarian Reform (DAR) ug ang Bureau of Jail Management and Penology (BJMP) nga magpadayon ang suplay sa pagkaon sa mga pasilidad sa tibuok nasod.
Ang BJMP ug DAR pormal nga nipirma og balik sa usa ka kasabutan alang sa ilang pagtinabangay ubos sa Partnership Against Hunger and Poverty program (PAHP).
Ang kasabutan nagtumong sa pagpadayon sa pagsuplay sa mga produkto sa agrikultura gikan sa mga lokal nga mag-uuma ngadto sa mga pasilidad sa BJMP alang sa pagkaon sa mga PDL.
Sa miaging tuig, nakapalit silag kapin sa P30 milyones nga balor sa mga produkto sa agrikultura gikan sa mga organisasyon sa mga mag-uuma, sumala ni BJMP Chief Ruel Rivera.
Samtang, kapin sa 357 ka mga pasilidad sa tibuok nasud ang kasamtangang adunay mga kasabutan sa pagpamaligya ubos sa Local Agrarian Reform Beneficiaries.
Ubos sa bag-ong panagtambayayong tali sa BJMP ug DAR, gilauman nga usa kini ka paagi sa pagsuporta sa mga lokal nga mag-uuma samtang matubag ang mga panginahanglanon sa pagkaon sulod sa mga pasilidad sa bilanggoan.
