Gipasalig sa Bureau of Internal Revenue (BIR) nga nagpadayon ang ilang mga lakang aron masiguro nga makolekta ang angay nga buhis sa nasud. Sumala ni Internal Revenue Commissioner Romeo Lumagui Jr., nga nakakolekta sila og kapin sa P1.1 trilyon nga buhis sa unang quarter sa tuig.
Matod ni Lumagui, makapaabot ang publiko nga gamiton gyud sa mga proyekto sa gobyerno ang makolektang buhis.
Dugang ni Lumagui nga usa sa ilang gitutokan sa pakigtambayayong sa Bureau of Customs (BOC) mao ang paggukod sa mga ilegal nga kalihukan sama sa illegal vape ug smuggled nga sigarilyo.
Dugang pa niya nga protektado sa balaod ang makahatag og impormasyon bahin sa ilegal nga kalihokan. Dugang usab niya nga confidential kini ug ang tanang report nga ilang madawat maaksiyonan.
Matud sa opisyal nga gawas nga makadaot sa pipila ka lehitimong negosyo, hulga usab sa panglawas sa publiko ang mga smuggled nga produkto ilabi na nga wala kini moagi sa tukmang proseso.
Dugang ni Lumagui nga buhaton nila ang tanan sa mga opisyal ug personnel sa BIR ingon man sa BOC ug PNP aron masikop ug manubag ang mga wala magbayad og buhis ilabi na kadtong nag-import og mga smuggled nga produkto aron molambo pa ang ekonomiya sa nasud.
Samtang, si Atty. Leon Mogao, Chief Investigation Division sa BOC, niingon sa samang forum nga padayon nilang gihingusgan ang monitoring aron masikop ang mga smuggled nga produkto.
Ang pamahayag ni Mogao nunot sa pagkadiskubre sa mga smuggled nga sibuyas sa usa ka tindahan sa Paco Market human sa inspeksyon sa Department of Agriculture (DA).
Matod niya nakig-alayon na sila sa DA aron ma-back-track o madeterminar kon diin sila gikan o kinsa ang mga importer nga nalambigit.
