SARAGANI – Kasamtangang anaa sa balay tambalanan ang biktimang giila nga si Bebot Tiwaro, 56 anyos, ug residente sa Sitio Dalangdang, Brgy Nagpan, Malungon, Sarangani Province, ug Jenny Cayong, 51 anyos, nga residente sa upper London, Brgy Bawing, General Santos City. Human kining gipusil sa wala mailhing suspetsado nga nakasuot ug bonnet ug itom nga jacket kagahapon sa hapon sa Sitio Kapway, Brgy. Amsipit, Maasim Sarangani Province.
Base sa inisyal nga imbestigasyon nga aduna matod pay nadawat nga tawag ang buhatan sa Maasim Municipal Police Station gikan sa usa ka tambalanan nga nagpahibalo nga adunay pagpamusil nga natigayon.
Gilayon kining girespondihan sa kapulisan ug didto nasayran nga ang mga biktima ang sakay sa usa ka motorsiklo nga nagsubay sa maong lugar ug aduna matod pay wala mailhing mga suspetsado ang nagbaktas kilid sa dalan ug gipusil ang mga nasampit ug naigo sa may paa hinungdan sa ilang pagkatumba sa gisakyang motorsiklo.
Ang mga suspek ang daling midagan padulong sa kasagbutan nga bahin sa lugar. Sa karon padayon ang imbestigasyon sa kapulisan sa Maasim ug nakig alayon na kini sa intel unit sa duol nga AFP camp aron nga ipahibalo ang maong insidente ug mailhan ang mga suspetsado.
