Subo nga gipahiluna sa iyang katapusang pahulayan ang 15-anyos nga dalagita kagahapong adlawa, sa usa ka public cemetery sa dakbayan sa Valencia.
Ang paglubong sa biktima dungan sa kusog nga panawagan og hustisya gikan sa pamilya ug mga kabanay human sa brutal nga kamatayon sa maong Grade 9 student.
Kahinumduman nga niadtong Enero 8, napalgan ang patayng lawas niini sa tunga sa katubhan sa Purok Sinait, Barangay Dagat-Kidavao, diin kini brutal nga gipatay ug gipugotan pa og ulo.
Sa pagkakaron, anaa na sa kustodiya sa Valencia City Police Station ang suspek nga giilang si Marlon Abdon Saraot, 38-anyos, kinsa nadakpan niadtong Enero 11 pinaagi sa manhunt operation sa kapulisan, militar, ug mga lider sa Indigenous People (IP).
Matud ni PCol. Oliver Sotto Navales, Provincial Director sa Bukidnon Police Provincial Office, ug ni City Administrator Atty. Heinz Guderian Villanueva, miangkon ang suspek nga iyang gilugos ang biktima sa wala pa kini brutal na gipatay.
Nasayran nga ang suspek usa ka kaniadto nang nakasuhan nga duna nay criminal record. Tungod niini, gihulagway sa kapulisan nga duna gayod kini “criminal mind.” Giandam na karon ang kasong Rape with Homicide batok kang Saraot base sa iyang pag-angkon ug sa mga ebidensya nga nakuha sa mga otoridad.
