Gilauman na usab ang dako nga pagsaka sa presyo sa mga produktong petrolyo sa sunod semana.
Base sa upat ka adlaw nga lihok sa Mean of Platts Singapore (MOPS) ug foreign exchange, gilauman nga mosaka ang presyo sa diesel og ₱6.00 hangtod ₱6.50 kada litro, samtang ang gasolina posibleng mosaka og ₱5.50 hangtod ₱6.00 kada litro.
Matud sa usa ka tinubdan sa oil industry, misaka pag-usab ang presyo sa lana sa pangkalibutanhong merkado tungod sa kabalaka sa posibleng pagkabalda sa suplay. Lakip sa mga hinungdan ang limitado nga pag-agi sa mga barko sa Strait of Hormuz ug nagkagrabe nga hulga sa seguridad sa Bab el-Mandeb Strait, nga nakaapekto sa global nga suplay sa enerhiya ug kalakalan.
Kasagaran ginapahibalo sa mga kompanya sa lana ang ilang price adjustment matag Lunes ug ipatuman kini sa sunod adlaw.
Kahinumdoman nga niadtong Hulyo 21, nagpatuman ang mga oil company og pagsaka sa presyo nga ₱3.50 hangtod ₱3.65 kada litro sa gasolina, ₱10.00 hangtod ₱10.68 kada litro sa diesel, ug ₱11.60 hangtod ₱11.77 kada litro sa kerosene.
Tungod sa pinakabag-ong oil price adjustment, miabot na sa ₱49.92 kada litro ang net increase sa gasolina, ₱50.43 kada litro sa diesel, ug ₱48.39 kada litro sa kerosene.
