Gi-report sa Bureau of Immigration (BI) ang pagkasikop sa tulo ka gidudahang peke nga mga Filipino sa managlahing operasyon sa Pampanga.
Gipaambit ni BI Commissioner Joel Viado ang pagkasikop sa usa ka Chinese national nga giilang si Lin Yi, 35, kaniadtong Hulyo 31 sa usa ka business establishment sa Pandan Road, Angeles City, Pampanga.
Ang pagkasikop naggumikan sa wala mailhing reklamo batok kang Lin, asa nasuta nga nagnegosyo og car wash sa maong dapit.
Ang reklamante nitaho nga si Lin giingong nigamit ug Filipino identity sa iyang mga transaksyon sa negosyo.
Ang BI nakadawat og kopya sa birth certificate ni Lin nga adunay ulahi ug kadudahang rehistrasyon, ingon man usa ka Philippine identification card ug opisyal nga resibo alang sa lisensya sa pagmaneho sa nasud.
Nasuta usab nga si Lin nagkupot ug working visa nga balido hangtod 2027 ubos sa iyang pagka-chinese.
Samtang, sa usa ka residential unit sa Sarmiento St., Malabanias, Angeles City, Pampanga, nasikop si Yan Yize, 30-anyos.
Nasikop usab sa Brgy. Panipuan, Mexico, Pampanga mao si Wang Jiangyi, 55 anyos.
Matod sa government intelligence forces, parehong naggamit ug Filipino identity ug giingong naghupot ug late-registered Philippine birth certificates, BIR TIN identification, ug business registration sa Securities and Exchange Commission.
Giingong konektado sila sa usa ka construction and development corporation nga giingong gigamit nga sakyanan sa mga kalihokan sa pagpanag-iya sa yuta.
